Decorrem nos dias 11 e 12 e incluem umha palestra, um mural público e umha concentraçom no lugar onde caiu morto por balas da polícia franquista espanhola. Na passada sexta-feira, 31 de julho, decorria umha assembleia em regime de autoconvocatória, na qual um grupo de vizinhos e vizinhas da Comarca de Trasancos acordárom criar umha comissom de trabalho para homeagear o patriota galego José Ramom Reboiras Noia, no 40.º aniversário do seu assassinato a maos da polícia espanhola na rua da Terra de Ferrol.Palestra
As atividades agendadas pola 'Comissom Moncho Reboiras' darám início a terça-feira 11 de agosto às 20hs no Ateneo Ferrolano, onde decorrerá umha palestra sob a legenda «Moncho Reboiras, semente de vencer». Na mesma, que será apresentada polo independentista Joám Lopes, intervirám Eliseo Fernandes, historiador ferrolano, que fará umha descriçom da situaçom sociopolítica do Ferrol dos anos 70, onde Reboiras realizou parte da sua atividade. Junto a Eliseo estará o militante independentista da Marinha Inácio Hernando, que foi camarada de Moncho na UPG da altura.
Mural coletivo e concentraçom de homenagem
Já para o dia 12 de agosto, foi convocada a elaboraçom coletiva de um mural coletivo em lembrança à figura do jovem comunista galego no Bairro da Madalena, no centro de Ferrol.
No mesmo dia 12, às 20.30hs, decorrerá ao pé do portal onde foi abatido Moncho Reboiras um ato de lembrança e homenagem, que contará com a intervençom de Lara Soto, em representaçom da Comissom Moncho Reboiras, acompanhada da poesía de Miguel «Vento de Trasancos», Pim Patinho e Ramiro Vidal. Umha oferta floral e o canto do Hino Nacional fecharám a homenagem. Posteriormente, na Fundaçom Artábria, haverá umha grelhada popular de confraternizaçom. / Ver: Diário Liberdade e Diário Liberdade
