Como em todas as brigadas que realiza o coletivo basco no exterior, a sua missom será conhecer a realidade da Galiza e para isso já tenhem concertadas reunions com diferentes partidos políticos, associaçons ecologistas e feministas, defensoras/es de Direitos Humanos, sindicatos, organizaçons juvenis e um longo etcétera. Nesses encontros visitarám umha boa parte na nossa geografia, na que, além das entrevistas, também participarám em atividades em centros sociais e por suposto na VIII ediçom da Cadeia Humana pola Liberdade das/os Presas/os Independentistas e nos atos do Dia da Pátria.Desde o Organismo Popular Anti-repressivo CEIVAR mostram o seu orgulho do interese que o nosso País e as bandeiras de dignidade que erguem as/os galegas/os estám despertando noutros países. Nos últimos tempos Askapena já participou em numerosas campanhas de solidariedade com o Povo Galego, entre as que se podem salientar adicar o 17 de Abril, Dia Internacional das/os Presas/os Políticas/os, do ano passado às/aos presas/os independentistas galegas/os ou participar ativamente enviando solidariedade na última ediçom da Marcha as Cadeias.
Ademais de reforçar os laços solidários, Ceivar considera que esta é umha excelente oportunidade «para partilhar as luitas em comum que mantemos com outros Povos do mundo» e é por isso que convidam a participar nos atos que já há programados assim como em encontros informais.
Em Ourense o encontro associativo Galiza-Euskal Herria foi ontem (15 de julho) na Praça do Pelourinho; em Vigo: Ceia-convívio no C.S. A Revolta do Berbés (17 de Julho às 21h); em Lugo: Palestra sobre a situaçom em Euskal Herria e o movimento internacionalista no C.S Mádia Leva! (19 de Julho às 19h); em Burela: Palestra sobre a situaçom em Euskal Herria e o movimento internacionalista no C.S. Xebra (20 de Julho às 20h30). / Ver: Diário Liberdade
